TANZANIA YAADHIMISHA MIAKA 19 YA KUMBUKUMBU YA MAUAJI YA KIMBARI

 Leo ulimwengu umeadhimisha miaka 19 baada ya mauaji ya Kimbari yaliyotokea nchini Rwanda mwaka 1994 na kugharimu maisha ya watu takriban milioni moja. Maadhimisho hayo hufanyika duniani kote kama siku maalumu ya kuwakumbuka wahanga wa vita ya wenyewe kwa wenyewe kati ya Wahutu na Watusi iliyopiganiwa ndani ya siku 1oo.

Maadhimisho hayo yalianza kuazimishwa tangu mwaka 2004 baada ya Umoja wa Mataifa kuiteua April 7 kila mwaka kuwa ni siku ya kumbukumbu ya mauaji ya Kimbari.

Nchini Tanzania maadhimisho hayo yamefanyika leo jijini Dar es salaam ambapo baadhi ya Wanadiplomasia mbalimbali walikusanyika katika Ukumbi wa Mikutano wa Mlimani City kwa ajili ya maadhimisho ambapo waliongozwa na Balozi wa Rwanda nchini Dk Benjamin Rugangazi  huku mgeni rasmi akiwa ni Mwanadiplomasia mkongwe Dk Salim Ahmed Salim.

Kabla ya maadhimisho hayo yalifanyika matembezi  ya kumbukumbu kuanzia  katika Viwanja vya New World Cinema- Mwenge hadi Mlimani City ambapo yalihudhuriwa na Wanafunzi mbalimbali wa Shule za Msingi na Sekondari za jijini Dar es salaam.

Maadhimisho hayo yalianza kwa kuwasha mishumaa ikiwa ni ishara ya upendo wa kuwakumbuka waliopoteza maisha katika vita hivyo mbapo yalifuatiwa na burudani kutoka kwa Wanafunzi wa shule ya Msingi ya Heritage na baadaye kumaliziwa na hotuba mbalimbali ikiwemo ya Dk salim.

Picha zifuatazo zinaonyesha matukio mbalimbali ya maadhimisho hayo.

ACB YAZINDUA HUDUMA YA MOBILE MONEY

Benki ya Akiba Commercial Bank(ACB) imezindua rasmi huduma za kifedha kupitia simu za mkononi zitakazo wawezesha wateja wa benki hiyo kutuma na kupokea pesa kupitia mitandao ya simu ya M-pesa, Airtel Money na Tigo pesa.

Akizindua huduma hiyo jijini Dar es salaam jana baada ya kutiliana saini ya ushirika na Kampuni ya Selcom Wireless, Mkurugenzi Mtendaji wa ACB John Lwande alisema wateja wa benki hiyo wataweza kutuma na kupokea pesa mahali popote walipo nchini bila kwenda kwenye tawi la benki.

“Mteja aliyejisajiri na Mobile money ya ACB anaweza kutuma pesa na kupokea kwa M-pesa kupitia akaunti yake ya simu inayoitwa Mobile Walet. Pia ataweza kutoa pesa kutoka kwenye akaunti ya ACB na kutuma kwenye akaunti za Airtel Money na Tigo pesa” alisema Lwande.

Mbali na huduma hizo za kutuma na kupkea pesa, wateja hao wateweza kurejesha mikopo benki bila kwenda kwenda kwenye tawi la benki na kupunguza gharama za muda na fedha.

Alizitaja faida za kujiunga na huduma hiyo kuwa ni urahisi wa kujiunga na kutumia huduma hizo za kifedha zinazopatikana nchi nzima, kutunza muda na pesa, na pia ni hatua muhimu za kimaendeleo za benki hiyo tangu ilipoanzishwa mwaka 1997.

“Wateja wa mitandao yote mitatu tunayoshirikiana nayo wataweza kutuma pesa hadi kiwango cha milioni 1 kwa gharama ya Sh1000 tu” alibanisha Lwande.

Alisema kuwa wateja hao pia wataweza kupata taarifa za salio la akaunti zao, taarifa fupi za kibenki pamoja na huduma za LUKU, Startimes, na DSTV.

“Wateja wasiwe na hofu kuhusu suala la usalama tumeshajipanga kuhakikisha hakuna tatizo katika muamala utakaofanyika kutoka benki kwenda katika mitandao hiyo na kuleta usumbufu na ikitokea hali hiyo tulishulikia haraka sana tatizo hilo” alisisitiza.

Mkurugenzi Mtendaji wa ACB John Lwande(katikati) akibadilishana mkataba na Mkurugenzi mtendaji wa Selcom Wireless Sammer Hirji(kulia) ma kushoto ni Meneja Mkuu wa idara ya ICT wa benki ya ACB.

MWALIKO KUHUDHURIA TAMASHA LA FILAMU ZA AFRIKA ULAYA

Madaraka Nyerere atakuwa mgeni rasmi wa maonyesho ya 18 ya Filamu za Afrika (AFF) yanayotarajia kufanyika kuanzia tarehe 29 mwezi mjini Leuven, Ubelgiji.

Mhe. Dkt. Diodorus Buberwa Kamala, Balozi wa Tanzania Ubelgiji, Uholanzi, Luxembourg na Jumuiya ya Ulaya anayo furaha kuwaalika Watanzania wote wanaoishi katika nchi za Ubelgiji, Uholanzi na Luxembourg kushiriki Tamasha la Filamu za Afrika ambalo litakuwa na siku mbili maalum za kuonyesha Filamu za Kitanzania. 

Filamu ya Kitanzania inayojulikana kwa jina la “A Teachers Country” itaonyeshwa  tarehe 29/03/2013 katika ukumbi wa sinema wa KINEPOLIS, Bondgenotenlaan 145, Leuven kuanzia saa mbili usiku. 

Aidha, tarehe 30/03/2013 Filamu za Kitanzania zinazojulikana kwa majina ya  “ The Road to Sainthood na Mwalimu: The Legacy of Julius Kambarage Nyerere”  zitaonyeshwa katika ukumbi wa Museum M, Leuven, Ubelgiji kuanzia saa 5.30 Asubuhi. Mhe. Madaraka Nyerere atakuwa mgeni rasmi.

Wote mnakaribishwa kuja kushiriki katika Tamasha la Filamu za Kitanzania.

Imetolewa na Dr. Diodorus Buberwa Kamala

Balozi wa Tanzania – BENELUX

21/03/2013